Како и за многу други работи, и за сопствените производствени капацитети ни текнува доцна. Предоцна за да бидеме подготвени кога ќе дојде кризата. Разговорите за можно рестартирање на ОКТА повторно го отвораат суштинското прашање: колку сме способни да ги обезбедиме основните потреби на државата кога меѓународните пазари ќе се нарушат?
Македонија мора да се сврти кон капацитетите на сопствена територија: производство на енергија и храна, преработувачка индустрија, функционална инфраструктура и стратешки резерви. Потребни се инвестиции, стручен кадар и план што ќе важи подолго од еден владин мандат. За ОКТА треба сериозна техничка, економска и еколошка процена, со јасни рокови и одговорност. Истиот пристап ни е потребен во секој сектор од кој зависи секојдневниот живот на граѓаните.
Целосна самодоволност е тешко остварлива. Но поголема отпорност е можна и мора да биде државен приоритет. Секој домашен капацитет што може одржливо да работи ни дава поголема сигурност и простор за одлучување во услови на војни, блокади и прекинати синџири на снабдување.
Цената на зависноста на крајот ја плаќаат граѓаните. Преку поскапа храна, поскапо гориво и понесигурен живот. Државата се подготвува додека има време. Кога кризата ќе тропне на врата, веќе ја плаќаме цената на пропуштеното.
Првпат објавено на Facebook, 16.10.2026.