На 30 јуни 2016 година, д-р Филип Петровски, директор на Државниот архив на Република Македонија, оствари посета на Генералната дирекција на Архивите на Албанија во Тирана.
![](https://filippetrovski.mk/wp-content/uploads/2021/09/posal4-300x211.jpg)
Оваа посета се реализираше врз основа на претходно упатена покана од страна на г-дин Гјет Ндој, директор на Генералната дирекција на Архивите на Албанија, а во рамките на договорот за соработка помеѓу Државниот архив на Република Македонија и Генералната дирекција на архивите на Албанија, потпишан на 6 ноември 2015 година во Скопје.
За време на посетата во Тирана, д-р Филип Петровски и неговиот колега г-дин Гјет Ндој, разговараа за обликот на понатамошната соработка меѓу двете државни архивски институции и можноста за збогатување на архивските фондови во двата архива со архивски документи кои се однесуваат на Македонија и македонската историја, односно Албанија и историјата на Албанија, а се наоѓаат во Државниот архив на Република Македонија или во Архивите на Албанија.
На средбата, Д-р Филип Петровски го информираше неговиот колега за неговиот избор за член на Извршниот одбор на Европскиот огранок на Меѓународниот архивски совет и за активностите околу иницијативата за формирање на Професионално архивско здружение на Југоисточна Европа. Двајцата директори разменија информации за начинот на работењето во нивните Архиви, на д-р Филип Петровски му беше овозможено да ги посети депоата на Генералната дирекција на Архивите на Албанија, а имаше можност да го посети и Националниот историски музеј во Тирана.
Соработката на Државниот архив на Република Македонија со Архивите на Албанија е традиционално добра и богата. Првиот договор за соработка меѓу овие два архиви е склучен уште во далечната 1991 година и од тогаш па до денес се реализирани повеќе проекти, како и научно-истражувачка работа во повеќе наврати и реципрочна размена на копии на архивски материјал, што се однесува за историјата на двете држави.
Извор: ДРЖАВЕН АРХИВ